Tenete

PENE I

1 Hamani ihora te atua i te ra‘i e te fenua i te matamua ra.

2 Te vai ano noa ra te fenua aore e faufaa, e te pouri hoi i nia iho i te iriatai; e ua faaarepurepu ihora te varua o te atua i nia iho i te moana.

3 Ua parau ihora te atua, ei maramarama; ua maramarama ihora.

4 Hi‘o a‘era te atua i te maramarama, e te maitai ra; e ua faataa ihora te atua i te maramarama e te pouri.

5 Mairi ihora te atua i ta te maramarama i‘oa, e ao, e mairi ihora oia i to te pouri i‘oa, e rui. e ahiahi ihora, e ao a‘era, o te mahana hoê ïa.

6 Ua parau ihora te atua, ei reva i rotopu i te pape, e na te reira e vehe i te pape, e te moana.

7 Ua hamani ihora hoi te atua i taua reva ra, vehe atura i te moana i raro a‘e i taua reva ra, e te pape i nia a‘e i taua reva ra; e oia mau atura.

8 Mairi ihora te atua i to te reva i‘oa, e ra‘i. e ahiahi ihora, e ao a‘era, o te mahana piti ïa.

9 Ua parau ihora te atua, ia pue ê te moana i raro a‘e i te ra‘i i te vahi otahi, ia itea te repo mǎrô; e oia mau atura.

10 Mairi ihora te atua i to te repo mǎrô ra i‘oa, e fenua; e taua moana i pue ê ra, mairi ihora oia i to te reira i‘oa, e tai; hi‘o a‘era te atua i te reira e e mea maitai.

11 Ua parau ihora te atua, ia tupu mai to te fenua raau rii, e te raau rii huero, e te mau raau rarahi e hotu ra, tei ia ratou iho to ratou huero, i to ratou huru, i nia i te fenua nei. e oia mau atura.

12 Ua tupu a‘era hoi to te fenua raau rii, e te raau rii huero, i to ratou huru, e te mau raau rarahi e hotu, tei ia ratou iho to ratou huero, i to ratou huru; hi‘o a‘era te atua i te reira e e mea maitai.

13 E ahiahi ihora, e ao a‘era, o te mahana toru ïa.

14 Ua parau ihora te atua, ei tiarama to roto i te reva i te ra‘i ra, ei faataa i te rui e te ao: e ei tapao ïa, e ei faaite no te mau tau, e no te mau mahana, e no te mau matahiti:

15 Ei tiarama ïa i roto i te reva i te ra‘i nei, e haamaramarama i te fenua. e oia mau atura.

16 Hamani ihora te atua i na tiarama rarahi e piti ra, o te tiarama rahi ra, ei haapaoraa ïa no te ao, e te tiarama iti, ei haapaoraa ïa no te rui: hamani ihora hoi oia i te mau fetia atoa.

17 E ua tuu ihora te atua i te reira i roto i te reva i te ra‘i ra, ei haamaramarama i te fenua nei;

18 Ei haapaoraa no te ao, e no te po, ei faataa i te maramarama e te pouri; hi‘o a‘era te atua i te reira e e mea maitai.

19 E ahiahi ihora, e ao a‘era, o te mahana maha ïa.

20 Ua parau ihora te atua, ia rahi te mea ora nee haere i raro i te moana, e te mau manu ia maue i nia a‘e i te fenua i roto i te reva atea i te ra‘i nei.

21 Hamani ihora te atua i te mau mea rarahi o te tai, e te mau mea ora hautiuti atoa o te moana e rave rahi ra, ma to ratou huru; e te mau manu pererau atoa, ma to ratou huru: hi‘o a‘era te atua i te reira e e mea maitai.

22 Ua haamaitai atura te atua ia ratou, na ôatura. ia fanau, e ia rahi, e ia î te moana ra o te miti ia outou; e ia rahi hoi te manu pererau i nia iho i te fenua nei.

23 E ahiahi ihora, e ao a‘era, o te mahana pae ïa.

24 Ua parau ihora te atua, ia fanau mai te fenua nei i te mau mea ora ma to ratou ra huru, te mau puaa, te mau mea e nee haere, e te mau manu avae maha o te fenua ra, ma to ratou ra huru: e oia mau atura.

25 Hamani ihora hoi te atua i te mau manu avae maha o te fenua ma to ratou huru, e te mau puaa ma to ratou huru, e te mau mea o te repo e nee nei ma to ratou huru; hi‘o a‘era te atua i te reira e e mea maitai.

26 Ua parau ihora te atua, e hamani tatou i te taata ma to tatou iho huru, ia au i to tatou iho hoho‘a; e ei nia iho ratou i te mau i‘a o te tai, e i nia iho i te mau manu o te reva, e i nia iho i te mau puaa, e i nia iho i te fenua atoa, e i nia iho hoi i te mau mea e nee haere i te fenua nei ra.

27 Hamani ihora hoi te atua i te taata ma to ’na ihora huru, i hamani oia ia ’na ma te hoho‘a o te atua ra; i hamani oia ia raua, o te tane e te vahine.

28 Ua haamaitai ihora te atua ia raua, na ô maira te atua, ia fanau orua, e ia rahi roa, e faaî i te fenua nei, e e haavi iho; e ia mana orua i nia iho i te i‘a o te tai, e i nia iho i te mau manu o te reva, e i nia iho i te mau mea atoa e nee haere i nia iho i te fenua nei.

29 Ua parau ihora te atua, inaha, te horoa ’tu nei au i te mau raau rii huero atoa o te fenua nei, e te mau raau rarahi atoa e hotu ra, no ’na iho to ’na huero ra; ei maa ïa na outou,

30 E na te mau manu avae maha atoa o te fenua nei, e na te mau manu atoa o te reva, e na te mau mea ora atoa e nee haere i nia iho i te fenua nei ra; na ratou te mau raau rii atoa ei maa. e oia mau atura.

31 Hi‘o a‘era te atua i te mau mea atoa ta ’na i hamani, e inaha, e mea maitai roa. e ahiahi ihora, e ao a‘era, o te mahana ono ïa.

PENE II

1 Oti roa a‘era te ra‘i e te fenua, e to ratou atoa ra.

2 Faaoti ihora hoi te atua i ta ’na ohipa i te mahana hitu ra, i ta ’na i rave; e faaea ihora oia i te mahana hitu, i ta ’na atoa ra mau ohipa i hamanihia e ana ra.

3 Ua haamaitai ihora te atua i te mahana hitu, e haamo‘a ’tura i te reira; no te mea, i reira to ’na faaearaa i ta ’na atoa ra mau ohipa ta te atua i hamani e i rave ra.

4 O te matamehai teie o te ra‘i e te fenua, i to ratou hamaniraahia, i te mahana i hamani ai te atua ra o iehova i te ra‘i e te fenua ra,

5 E te mau raau atoa o te fenua nei aore i nia iho i te fenua i reira, e te mau raau rii o te fenua nei aore i tupu; aita hoi te atua ra o iehova i haamairi mai i te ûa i nia iho i te fenua i reira, e aore hoi e taata ei faaapu.

6 I pee atura râ te mahu i nia no roto i te fenua, rari paatoa ihora te fenua.

7 A hamani ai te atua ra o iehova i te taata i te repo fenua nei, ua haapuai ihora oia i te aho ora i roto i tana apoo ihu ra, riro a‘era te taata ei taata ora.

8 Ua ô hoi te atua ra o iehova i te ô i te pae i te hitia o te râ i edene ra, e ua tuu ihora oia i te taata ta ’na i hamani ra i reira.

9 Ua faatupu te atua ra o iehova i te mau raau maitatai atoa ia hi‘o, e tei au ei maa, i taua fenua ra; e te raau ora i ropu i taua ô ra, e te raau e ite ai i te maitai e te ino.

10 Ua tahe maira te hoê pape mai roto mai i edene, ei faararirari i taua ô ra; e i reira te maaraa taua pape ra, e a maha ’tura anapape rarahi.

11 Pisona te i‘oa o te hoê; o tei haaati ïa i te fenua ra o havila, eauro to reira;

12 E auro maitai to te reira fenua; e ofafai rii maitatai hoi to reira e piti atoa huru.

13 E te i‘oa o te piti o te pape, o gihona ïa; o tei haaati i te fenua o kusa ra.

14 E te i‘oa o te toru o te pape, o hidekela ïa; o tei tahe tia i te pae i te hitia o te râ i asura ra. e te maha o te pape, o eupharate ïa.

15 Ua rave ihora te atua ra o iehova i te taata, tuu ihora ia ’na i roto i taua ô i edene ra, ei faaapu, e ei tiai.

16 Ua parau maira te atua ra o iehova i te taata, na ô maira, e amu noa oe i to te mau raau atoa o te ô nei;

17 Area i to te raau e ite ai i te maitai e te ino, eiaha oe e amu i te reira; ei te mahana e amu ai oe i te reira, e pohe ïa oe.

18 Ua parau ihora te atua ra o iehova, e ere ïa i te mea maitai ia parahi noa adamu oia ana‘e ra; e hamani au i te tahi tauturu au na ’na ra.

19 Ua hamani hoi te atua ra o iehova i te mau manu avae maha atoa o te fenua nei, e te mau manu atoa o te reva, i te repo fenua; e ua aratai mai ia adamu ra, ia itea ta ’na i‘oa e mairi; e ta adamu i‘oa e mairi i taua mau mea ora atoa ra, ia riro te reira ei i‘oa mau.

20 I mairi noa râ adamu i te i‘oa no te mau puaa atoa, e to te mau manu atoa o te reva, e to te mau manu avae maha o te fenua nei; aita roa râ o adamu e tauturu au i itea.

21 Haamairi ihora te atua ra o iehova i te varea taoto rahi i nia ia adamu; taoto ihora oia, ua rave ihora oia i te hoê aoao no ’na, taati ihora i te i‘o i taua vahi ra;

22 E taua aoao o adamu ta te atua ra ta iehova i rave ra, hamani ihora oia ei vahine; e ua aratai maira oia ia ’na ia adamu ra.

23 Ua na ô ihora adamu, i teie nei, e ivi teie no to ’u nei ivi, e i‘o hoi no to ’u nei i‘o: e parauhia oia e, e vahine, no te mea, no roto oia i te taata i te noaaraa mai.

24 No reira e faarue ai te taata i tana metua tane e tana metua vahine, a ati atu ai i ta ’na vahine, e e riro hoi raua ei hoê.

25 Te vai tahaa noa ra adamu raua atoa o te vahine, aita râ raua i haama.

PENE III

1 E paari rahi to te ophi i to te mau manu avae maha atoa o te fenua, i ta te atua ra ta iehova i hamani ra; e ua na ô maira oia i te vahine, oia ïa, ua parau mai te atua e, eiaha orua e amu i to te mau raau atoa o te ô nei?

2 Ua parau atura te vahine i taua ophi ra, e amu mâua i to te mau raau atoa o te ô nei;

3 Maori râ o to taua raau i ropu i te ô nei, ua parau mai ïa te atua e, eiaha orua e amu i to reira; eiaha hoi orua e rave noa ’tu; a pohe orua.

4 Ua parau maira taua ophi ra i te vahine, e ore roa orua e pohe:

5 Ua ite hoi te atua e, ua amu ana‘e orua i to reira, e araara ïa to orua mata, e e riro orua mai te atua ra te huru, i te ite i te maitai e te ino.

6 E ite a‘era te vahine, e raau maitai ei maa, e te au hoi i te mata ia hi‘o atu, e te raau hinaaro hoi ia noaa te ite; ua rave ihora oia i te maa no nia i taua raau ra, amu ihora, hopoi atura hoi i ta te tane, amu atoa ihora hoi oia.

7 Araara a‘era to raua mata, ite a‘era raua e te vai tahaa noa ra raua; ua fatu ihora raua i te rau suke ei pareu no raua.

8 E ite a‘era raua i te reo o te atua ra o iehova i te harururaa i roto i te ô, i te mǎrǔraa mahana ra; ua tapuni ihora adamu raua o te vahine i te aro o te atua ra o iehova, i roto i te uru raau o te ô ra.

9 Ua tiaoro maira râ te atua ra o iehova ia adamu, na ô maira ia ’na, tei hea oe?

10 Ua na ô atura oia, faaroo a‘era vau i to reo i roto i te ô nei, mǎta‘u a‘era vau o vau i vai tahaa noa, tapuni a‘e nei au.

11 Uana ô maira oia, na vai oe i faaite e te vai tahaa noa ra oe? i amu na oe i to te raau ta ’u i parau atu ia oe e, eiaha e amu?

12 Ua parau atura adamu, na te vahine ta oe i ho mai ei apiti no ’u ra, i horoa mai i to taua raau ra, amu ihora vau.

13 Ua parau maira te atua ra o iehova i te vahine ra, eaha teie ta oe i rave na? ua na ô atura te vahine ra, i haavare mai te ophi ia ’u, amu ihora vau.

14 Ua parau maira te atua ra o iehova i taua ophi ra, ia rahi roa to oe ino i to te mau puaa atoa, e te mau manu avae maha atoa o te fenua nei, o oe i na reira ra; ei raro i to aro e nee noa ’i oe, e amu hoi oe i te repo e hope roa’‘e to oe pue mahana i to oraraa na:

15 E tuu hoi au i te au ore e riri ai ra ia orua o te vahine, e to huaai, e to ’na ra huaai; na ’na e haaparuparu i to afii, e na oe e haaparuparu i to ’na poro avae.

16 Ua parau maira oia i te vahine. e faarahi au i to mauiui tamarii ra, e fanau mai ta oe tamarii ma te mauiui; e e auraro oe i to tane, e ei fatu oia no oe.

17 Ua parau maira oia ia adamu, no te mea, ua faaroo oe i te reo o to vahine na, e ua amu i to te raau i ta ’u i parau atu ia oe, i te na ôraa ’tu e, eiaha oe e amu i to reira; ia ino roa te fenua ia oe; e amu oe i to reira ma te oto e hope roa’‘e to oe pue mahana i to oe na oraraa:

18 E tupuhia ïa i te tataramoa, e te motuu, no oe; e e amu oe i te raau rii o te fenua nei:

19 E amu oe i ta oe maa ma te hou i nia i to rae, e ho‘i noa ’tu oe i raro i te repo, no reira mai hoi oe; e repo hoi oe, e e ho‘i faahou atu â oe i te repo.

20 Ua mairi ihora adamu i to te vahine ra i‘oa, o eva, no te mea, e riro oia ei metua vahine no te taata ora atoa.

21 Ua hamani ihora te atua ra o iehova i te ahu iri no adamu raua o te vahine, e ua faaahu maira ia raua.

22 Ua parau ihora te atua ra o iehova, inaha, ua riro adamu mai te hoê o tatou nei, i te ite i te maitai e te ino; e tena na, o te faatoro oia i tana rima, e rave atoa i to te raau ora ra, e e amu, ia ora roa oia ra.

23 Ua tiavaru atura te atua ra o iehova ia ’na i rapae i taua ô i edene ra, e faaapu i te fenua, no reira hoi oia ra.

24 Tiahi atura oia i te taata i rapae, ua tuu ihora, i te pae i te hitia o te râ i taua ô i edene ra, te kerubi ma te ‘o‘e ura e fariuriu haere, ei tiai i te e‘a i te raau ora ra.

PENE IV

1 Ite ihora adamu i ta ’na vahine ia eva, hapu a‘era oia, e fanau maira o kaina, ua na ô a‘era, e taata ta ’u i noaa iho nei ia iehova.

2 E fanau faahou ihora oia i te teina ia abela: e faaamu mamoe abela, e e taata faaapu kaina.

3 E tae a‘era i te tau i haapaohia ra, ua hopoi atura kaina i te maa o te fenua nei ei ô na iehova.

4 E ua hopoi atoa hoi abela i te hoê mamoe maitai e te poria no roto i te nǎnǎ ra; ite maira iehova ia abela e ta ’na ô;

5 Area o kaina e ta ’na ô, aore ïa oia i ite mai. riri roa a‘era kaina, e tuatua ’tura tana mata.

6 Ua parau maira iehova ia kaina, eaha oe i riri ai; e eaha hoi i tuatua ’i to mata na?

7 Ia rave oe i te parau maitai ra, eita anei e itehia mai? e aore i maitai ra, te vai ra te taraehara i te uputa na. e auraro râ oia ia oe, e ei nia’‘e oe ia ’na.

8 Ua parau maira râ kaina i tana taeae ia abela, e tae atura raua i roto i taua aua ra, tei nia maira kaina i tana teina ia abela, taparahi pohe roa ihora.

9 Ua parau maira iehova ia kaina, teihea to teina o abela? ua parau atura oia, aore au i ite; o vau anei te tiai i tau teina?

10 Ua parau maira te atua, i aha na oe? te pii maira te reo ra o te toto o to taeae mai te repo maira ia ’u:

11 E tena na, ua ino roa oe i taua fenua nei, ua hamǎmǎ iho nei i to ’na vaha e farii i te toto o to teina i ta to rima i haamanii na:

12 Ia faaapu oe i te fenua na, eita ’tura ïa e faatupu i te maa na oe; e riro oe ei oere, e ei ori haere noa, i te fenua na.

13 Ua parau atura kaina ia iehova, e rahi ta ’u utua, eita e tia ia ’u ia faaoromai:

14 Inaha, ua tiahi mai nei oe ia ’u i teie nei mahana mai nia mai i te fenua nei; e mai mua ’tu i to aro na e moe ê atu vau, e riro hoi au ei oere, e ei ori haere noa i nia i te fenua nei, e te taata e farerei noa mai ia ’u nei e riro ïa i te taparahi mai ia ’u.

15 Ua parau maira iehova ia ’na, o te taparahi ia kaina ra, e tataihituhia to ’na pohe. ua tuu maira iehova i te tahi tapao ia kaina ra, ia ore roa te hoê taata e farerei ia ’na ra ia taparahi mai.

16 Haere ê atura kaina mai mua ’tu i te aro o iehova ra, parahi atura i te fenua ra i noda, i te pae i te hitia o te râ i edene ra.

17 Ite ihora kaina i ta ’na vahine; tô ihora oia, e fanau atura o enoha; te faatia ra oia i te oire i reira, mairi ihora oia i taua oire ra ia enoha, i te i‘oa o ta ’na ra tamaiti.

18 Fanau ihora ta enoha o irada; fanau ihora ta irada o mehuiaela; fanau ihora ta mehuiaela o metusaela; fanau ihora ta metusaela o lameha.

19 Ua rave ihora lameha i e toopiti pue vahine na ’na; o ada te tahi i te i‘oa, e o zila te tahi.

20 Fanau maira ta ada o iabala: o te matamua ïa o te feia i parahi i te tiahapa ra, o tei tiai i te puaa ra.

21 O iubala te i‘oa o to ’na teina: o te matamua ïa o te feia i faaoto i te kinura e te vivo ra.

22 Fanau ihora hoi ta zila o tubala-kaina, e tahu‘a paari ïa i te auri e te veo nei: e te tuahine o tubala-kaina ra, o naamaha ïa.

23 Ua parau atura lameha i na vahine na ’na ra, e ada e zila, e faaroo mai i tau reo; e na vahine a lameha, faaroo mai i tau parau. ua taparahi â hoi au i te taata, ua paruparu na râ vau, e taata apî tei pohe ia ’u, o vau i haruhia mai.

24 Ia tataihitu i te tahoo ia kaina ra, e riro i te tataihitu ahuru e ia hitu tiahapa ia lameha.

25 Ite faahou ihora adamu i ta ’na vahine ra ia eva, e ua tô ihora oia e fanau atura e tamaiti, mairi ihora i to ’na i‘oa o seta; ua na ô a‘era hoi oia, ua haapao te atua i te tahi huaai no ’u ei ono ia abela, ta kaina i taparahi a‘enei.

26 E fanau ihora hoi ta seta e tamaiti; e mairi ihora oia i to ’na i‘oa o enosa. i reira to te taata mairiraahia i te i‘oa no ǒ ia iehova ra.

PENE V

1 Te parau teie o te huaai o adamu. a hamani ai te atua i te taata ra, i hamani oia ia ’na ma to te atua ra huru.

2 I hamani oia ia raua ei tane e ei vahine, e ua haamaitai maira ia raua, mairi ihora i to raua i‘oa o adamu, i te mahana i hamanihia ’i raua ra.

3 E hoê a‘era hanere e toru ahuru to adamu matahiti, fanau ihora ta ’na e tamaiti, mai ia ’na ihora te huru, ua au i to ’na ihora hoho‘a; mairi ihora i to ’na i‘oa o seta.

4 E to adamu ra pue mahana i muri a‘e i ta ’na fanauraa ia seta ra, e vau ïa hanerematahiti; e fanau ihora hoi ta ’na tamarii tamaroa, e te tamarii tamahine.

5 E to adamu pue mahana atoa i to ’na ra oraraa, e iva ïa hanere, e toru ahuru i te matahiti; pohe ihora oia.

6 Parahi ihora seta e hoê a‘era hanere e pae tiahapa i te matahiti, fanau ihora ta ’na o enosa.

7 Parahi ihora seta i muri a‘e i ta ’na fanauraa ia enosa ra, e vau a‘era hanere, e hitu tiahapa i te matahiti; e fanau ihora hoi ta ’na tamarii tamaroa, e te tamarii tamahine.

8 E to seta ra pue mahana atoa i te ao nei, e iva ïa hanere, hoê ahuru, e piti tiahapa i te matahiti; pohe ihora oia.

9 Parahi ihora enosa e iva a‘era ahururaa i te matahiti, fanau ihora ta ’na o kainana.

10 Parahi ihora enosa i muri a‘e i ta ’na fanauraa ia kainana ra, e vau a‘era hanere, hoê ahuru, e pae tiahapa i te matahiti, e fanau ihora hoi ta ’na tamarii tamaroa, e te tamarii tamahine.

11 E to enosa pue mahana atoa i te ao nei, e iva ïa hanere, e pae tiahapa i te matahiti; pohe ihora oia.

12 Parahi ihora kainana e hitu a‘era ahururaa i te matahiti, fanau ihora ta ’na o malaleela.

13 Parahi ihora kainana i muri a‘e i ta ’na fanauraa ia malaleela ra, e vau a‘era hanere, e maha ahururaa i te matahiti, e fanau ihora hoi ta ’na tamarii tamaroa, e te tamarii tamahine.

14 E to kainana pue mahana atoa i te ao nei, e iva ïa hanere, hoê ahuru i te matahiti; pohe ihora oia.

15 Parahi ihora malaleela e ono a‘era ahuru, e pae tiahapa i te matahiti, fanau ihora ta ’na o iareda.

16 Parahi ihora malaleela i muri a‘e i ta ’na fanauraa ia iareda ra, e vau a‘era hanere, e toru ahururaa i te matahiti, e fanau ihora hoi ta ’na tamarii tamaroa, e te tamarii tamahine.

17 E to malaleela pue mahana atoa i te ao nei, e vau ïa hanere, e iva ahuru, e pae tiahapa i te matahiti; pohe ihora oia.

18 Parahi ihora iareda e hoê a‘era hanere e ono ahuru e piti tiahapa i te matahiti, fanau ihora ta ’na o enoha.

19 Parahi ihora iareda i muri a‘e i ta ’na fanauraa ia enoha ra, e vau a‘era hanere i te matahiti, e fanau ihora ta ’na tamarii tamaroa, e te tamarii tamahine.

20 E to iareda pue mahana atoa i te ao nei, e iva ïa hanere, e ono ahuru, e piti tiahapa i te matahiti; pohe ihora oia.

21 Parahi ihora enoha e ono a‘era ahuru, e pae tiahapa i te matahiti, fanau ihora ta ’na o metusela.

22 E ua au maite to enoha haerea i te atua i muri a‘e i ta ’na fanauraa ia metusela ra, e toru a‘era hanere i te matahiti, e fanau ihora hoi ta ’na tamarii tamaroa, e te tamarii tamahine.

23 E to enoha pue mahana atoa i te ao nei, e toru ïa hanere, e ono ahururaa, e pae tiahapa i te matahiti.

24 I au maite hoi to enoha haerea i te atua, e aita ra oia; ua hopoi-ê-hia hoi oia e te atua ra.

25 Parahi ihora metusela e hoê a‘era hanere, e vau ahuru, e hitu tiahapa i te matahiti, fanau ihora ta ’na o lameha.

26 Parahi ihora metusela i muri a‘e i ta ’na fanauraa ia lameha ra, e hitu a‘era hanere, e vau ahuru, e piti tiahapa i te matahiti, e fanau ihora hoi ta ’na tamarii tamaroa, e te tamarii tamahine.

27 E to metusela pue mahana atoa i te ao nei, e iva ïa hanere, e ono ahuru, e iva tiahapa i te matahiti; pohe ihora oia.

28 Parahi ihora lameha e hoê a‘era hanere, e vau ahuru, e piti tiahapa i te matahiti, fanau ihora ta ’na e tamaiti;

29 Mairi ihora oia i to ’na i‘oa o noa, na ô a‘era, e riro teie nei tamaiti ei haamaharaa aho no tatou, i to tatou rohirohi, e te ohipa a to tatou nei rima, no te fenua i parau-ino-hia e iehova ra.

30 Parahi ihora lameha i muri a‘e i ta ’na fanauraa ia noa ra, e pae a‘era hanere, e iva ahuru, e paetiahapa i te matahiti, e fanau ihora hoi ta ’na tamarii tamaroa, e te tamarii tamahine.

31 E to lameha pue mahana i te ao nei, e hitu ïa hanere, e hitu ahuru, e hitu tiahapa i te matahiti; pohe ihora oia.

32 E a pae a‘era o noa hanere i te matahiti; fanau ihora ta ’na o sema, o hama, e o iapheta.

PENE VI

1 E rahi roa a‘era te taata i nia i te fenua nei, e ta ratou mau tamahine i te fanauraa,

2 Ua hi‘o a‘era te tamarii a te atua ra i te mau tamahine a te taata nei, e te maitai ra; ua rave ihora ratou i ta ratou i hinaaro ra ei vahine.

3 Ua na ô a‘era iehova, e ore roa tau varua e mârô i te taata nei e a muri noa ’tu, e taata hoi oia: e teie nei, o to ratou pue mahana e toe nei, hoê ïa hanere, e piti ahuru i te matahiti.

4 E aito haapao atâ tei te fenua nei i taua anotau ra. e a muri a‘era, ia rave hoi te tamarii a te atua i te mau tamahine a te taata ra, fanau ihora ta ratou tamarii tamaroa, e riro atura ratou ei aito, e feia tui roo ïa i tahito ra.

5 Ite a‘era iehova, e ino rahi to te taata o te ao nei, e ua ino ana‘e te mau mana‘o atoa, e te mau opuaraa atoa o te aau i te mau mahana atoa ra.

6 Tatarahapa ihora iehova oia i hamani i te taata i nia i te fenua nei; ooo roa a‘era tana aau.

7 Ua na ô a‘era iehova, e haamou vau i te taata, i hamanihia e au, i nia i te fenua nei; o te taata, e te mau puaa atoa, e te mau mea e nee haere ra, e te mau manu o te reva; ua tatarahapa hoi au o vau i hamani ia ratou.

8 Area noa i arohahia mai oia e iehova ra.

9 Teie te mau parau i tupu i to noa ra anotau. e taata hau noa i te parau-tia e te pi‘o ore i to ’na ra ui: e ua au to noa haerea i te atua.

10 Tootoru a noa tamarii tamaroa i fanau, o sema, o hama, e o iapheta.

11 Ua ino roa ra te fenua i mua i te aro o te atua, ua î te fenua i te parau-tia ore.

12 Ua hi‘o ihora hoi te atua i te fenua nei, e inaha, ua ino roa; ua ino roa te haerea o te taata atoa o te ao nei.

13 Ua parau maira te atua ia noa, ua fatata roa te hopea o te taata atoa ra ia ’u; ua î hoi te fenua i te parau-tia ore ia ratou: e inaha, te rave nei au e haamou ia ratou e te fenua atoa nei.

14 A tarai oe i te tahi pahi no oe ei gophera te raau, e hamani hoi oe i te piha i roto i taua pahi na, e i‘a hoi i roto e rapae a‘e i te tapau.

15 Teie te huru o te pahi ia tarai oe. te maoro o taua pahi nei, e toru ïa hanere i te kubiti, te aano râ, e pae ïa ahuru i te kubiti, e te teitei ra, e toru ïa ahuru i te kubiti.

16 Ei haamaramarama hoi to taua pahi nei na oe e hamani, ia hoê kubiti, te teitei i nia i te faaotiraa ra; e tuu hoi oe i te opani i te hiti o te pahi; ei tahua to raro roa, e te piti hoi o te tahua, e te toru hoi o te tahua, ta oe ïa e hamani.

17 Inaha hoi! teie au a hopoi mai i te diluvi i nia i te fenua nei, ia pohe roa te mau mea ora e huti i te aho i raro a‘e i teie nei ra‘i; te mau mea ora atoa o te fenua nei, e pohe ïa.

18 E faaau na râ vau i tau faufaa ia oe; e tae oe i roto i te pahi; o oe, e to mau tamarii, e to vahine, e na vahine a to tamarii ra.

19 E te mau mea ora atoa e rave rahi te huru ra, e tataipiti-ana‘e-hia, o ta oe ïa e aratai atoa i roto i te pahi ra, ia ora ratou, e oe atoa ra; te oni e te ufa te aratai atoa i roto.

20 O te mau manu pererau i to ratou ra huru, e te mau puaa i toratou ra huru, e te mau mea e nee haere i nia i te fenua nei, i to ratou ra huru, tataipiti-ana‘e-hia ïa ia haere mai ia oe na, ia ora ratou.

21 E e rave oe i te mau maa atoa e rave rahi te huru ra, e haaputu maite i te vairaa, ei maa na oe, e na ratou atoa ra.

22 Ua na reira hoi noa i te mau mea atoa ta te atua i faaue mai ia ’na ra, o ta ’na ïa i rave maite.

PENE VII

1 Ua parau maira iehova ia noa, a haere oe e to fetii atoa i roto i te pahi; o oe hoi ta ’u taata parau-tia i ite i mua i tau aro i teie nei ui.

2 To te mau puaa viivii ore atoa ra, e tataihitu ïa ia hopoi oe i roto ra, o te oni e te ufa; e to te mau puaa viivii ra, e tataipiti ïa, o te oni e te ufa;

3 To te mau manu o te reva, e tataihitu atoa ïa, o te oni e te ufa; ia ora to ratou fanau‘a i nia i te fenua atoa nei.

4 E hitu â rui toe e haamairi mai ai au i te ûa i nia i te fenua nei, e ia piti taau rui, e ia piti taau ao; e e haamou vau i te mau mea ora atoa, i hamanihia e au, i nia iho i te fenua atoa nei.

5 E ua na reira hoi noa mai ta iehova atoa i faaue mai ia ’na ra.

6 A ono a‘era o noa hanere i te matahiti, a roohia mai ai te fenua i te diluvi.

7 Ua tomo atura noa, e ta ’na vahine, e ta ’na mau tamarii, e ta ratou mau vahine atoa, i roto i te pahi, no taua diluvi ra.

8 To te mau puaa viivii ore, e te mau puaa viivii, e to te mau manu, e te mau mea e nee haere i nia i te fenua nei,

9 Ua tataipiti ana‘e ïa i te haere-atoa-raa, e noa atoa i roto i te pahi, o te oni e te ufa, i ta te atua i faaue ia noa ra.

10 E tae a‘era i te rui hitu ra, o te pape diluvi maira i nia i te fenua.

11 I te ono o te hanereraa o to noa matahiti, i te piti o te marama, e te ahuru ma hitu o te rui i taua marama ra, tei taua rui mau ra te amahamaharaa ïa o te tumu o te moana rahi ra, e iritihia a‘era te mau uputa o te ra‘i ra.

12 Mairi ihora te ûa rahi i nia i te fenua nei, e a maha a‘era ahururaa o te po, e maha hoi ahururaa o te ao.

13 Tei taua mahana mau ra to noa, e na tamarii a noa, sema, e o hama, e o iapheta, e te vahine a noa, e na vahine tootoru atoa a na tamarii a noa ra tomoraa i roto i te pahi,

14 Ratou, e te mau manu oviri avae maha atoa i to ratou ra huru, e te mau puaa atoa i to ratou ra huru, e te mau mea e nee haere i nia i te fenua nei i to ratou ra huru, e te mau moa i to ratou ra huru, te mau manu pererau atoa ua rau te huru.

15 Tataipiti atura to te mau mea ora atoa e huti i te aho ra i te haere-atoa-raa, e noa atoa i roto i te pahi.

16 E o taua mau mea i haere i roto ra, i na ô ratou i te haere, o te oni e te ufa, to te mau mea ora atoa ra, mai ta te atua i faaue ia ’na ra: e na iehova i opani i te uputa ia ’na.

17 Roohia ihora te fenua i te diluvi e a maha a‘era ahururaa o te ao, e rahi atura taua pape ra, e maraa a‘era te pahi i nia, e teitei a‘era i nia’‘e i te fenua ra.

18 E u‘ana roa maira taua pape ra, rahi roa maira i nia i te fenua nei; mânu noa ’tura te pahi i nia i te iriatai.

19 E rahi roa maira hoi te pape i nia iho i te fenua nei; e nina-atoa-hia te mau mou‘a teitei atoa i raro a‘e i te ra‘i nei.

20 Teitei roa ’tura te pape i nia’‘e i te mau mou‘a atoa i ninahia ra, e hoêahuru, e pae tiahapa i te kubiti.

21 Hope roa a‘era te mau mea ora atoa o te fenua nei i te pohe, te mau manu pererau, e te puaa, e te mau manu avae maha, e te mau mea e nee haere i nia i te fenua nei; e te taata atoa e hope roa’‘e;

22 O te mau mea ora atoa e huti i te aho nei, te mau mea atoa i nia i te pae nei, pohe ihora ïa.

23 Mou roa a‘era to te fenua atoa ra; o te taata, e te puaa, e te mau mea e nee haere ra, e te manu atoa o te reva nei; mou roa a‘era ïa i nia i te fenua nei; o noa ana‘e ra, e taua feia i roto atoa i te pahi ra, tei toe.

24 Te vai roa ’tura te moana i nia i te fenua nei, e hoê a‘era hanere, e pae ahururaa o te rui ra.

PENE VIII

1 Te mana‘o ra te atua ia noa, e i te mau mea ora atoa, e te mau puaa atoa i roto atoa i te pahi ra; e ua faafarara ihora te atua i te hoê mata‘i na nia i te fenua ia pahee taua moana ra.

2 Opanihia ihora te tumu o te moana, e te mau uputa o te ra‘i ra, e faaorehia ihora te ûa rahi no te ra‘i mai;

3 Pahee maite atura taua moana ra mai nia ’tu i te fenua nei, aita i faaea; e hope a‘era taua na rui hoê hanere, e pae ahuru ra, ua iti roa ihora taua moana ra.

4 E tae atura i te hitu o te marama ra, e te rui hoê ahuru ma hitu i taua marama ra, ua iri ihora taua pahi ra i nia i te mou‘a ra o ararata.

5 Te iti noa ra taua pape ra, e tae roa a‘era i te ahuru o te marama ra; e itea ihora te upoo mou‘a i te mahana matamua o taua marama hoê ahuru ra.

6 E hope a‘era hoi na rui e maha ahuru ra, ua iriti a‘era noa i te hoê haamaramarama i hamanihia e ana no taua pahi ra.

7 Ua tuu atura i te hoê oreba, tei maue atu, e ua maue mai, e pâpâ roa a‘era te pape i nia iho i te fenua nei.

8 E ua tuu atura hoi oia i te hoê uuairao, ia itea te oreraa o te pape i nia iho i te fenua;

9 Aita râ o te uuairao tauraa i itea, ho‘i maira oia i te pahi ia ’na ra, te vai noa ra hoi te pape i nia iho i te fenua e ati noa a‘e: ua faatoro atura oia i tana rima, rave atura, ume maira i roto i te pahi ia ’na ra.

10 Ua tiai ihora hoi oia e rui hitu a‘era; ua tuu faahou atura i taua uuairao ra i rapae i te pahi;

11 Ua ho‘i maira taua uuairao ra i te ahiahi ia ’na ra, e inaha! e rau olive pofai-apî-hia tei te vaha: ite a‘era noa e ua iti te pape i nia i te fenua ra.

12 Ua tiai ihora hoi oia e ia rui hitu â; e ua tuu atura hoi i te uuairao; e aore ïa i ho‘i faahou mai.

13 E tae a‘era i te ono o te hanere hoê tiahapa i te matahiti, i te rui hoê o te marama matamua ra, ua pâpâmǎrô a‘era te pape i nia i te fenua ra; ua iriti a‘era noa i te tahua o te pahi ra, ua hi‘o ihora, e inaha, ua marô i nia iho i te fenua.

14 E tae a‘era i te piti o te marama, e te taau ma hitu o te rui i taua marama ra, ua marô te fenua.

15 Ua parau maira te atua ia noa, na ô maira,

16 A haere na i rapae i te pahi, o oe, to vahine, e to mau tamarii, e na vahine a to mau tamarii atoa ra;

17 E tuu atoa hoi i te mau mea ora atoa na e rave rahi te huru ra i rapae, i te mau manu pererau ra, e te mau puaa ra, e te mau mea atoa e nee haere i nia i te fenua ra; ia fanau‘ahia i nia i te fenua na, e ia rahi ratou i nia i te fenua na.

18 Ua haere ihora noa i rapae, e ta ’na mau tamarii, e ta ’na vahine, e te vahine a na tamarii na ’na ratou atoa ra.

19 E te mau manu avae maha, e te mau mea e nee haere ra, e te mau manu pererau, e te mea e nee haere i nia i to fenua nei, i to ratou ra mauhuru, ua haere ana‘e ïa i rapae, mai roto mai i taua pahi ra.

20 Ua faatia ihora noa i te fata na iehova; e ua rave ihora i to te mau puaa viivii ore ra, e te mau manu viivii ore atoa ra, ua pûpû atura i te tusia taauahi i nia i taua fata ra.

21 Ho‘i ihora iehova i te hau‘a no‘ano‘a ra; e ua na ô a‘era iehova i roto i tana aau, e ore roa te fenua e ino faahou ia ’u, i te taata nei; ino noâ te mana‘o o to te taata aau mai to ’na tamarii-rii-raa mai â; e ore hoi au e tairi faahou i te mau mea ora atoa, mai ta ’u i rave iho nei:

22 I teie nei râ, te vai nei te fenua, e vai atoa mai te tau tanuraa, e te ootiraa, te toetoe, e te mahanahana, te auhune, e te poia, te ao, e te po, eita e ore.

PENE IX

1 Ua haamaitai maira te atua ia noa, e ta ’na ra mau tamarii, ua na ô maira ia ratou, ia fanau te tamarii, e ia rahi outou, e ia î te fenua nei.

2 E e tuuhia te mǎta‘u ia outou, e te mehameha ia outou, i nia i te mau manu avae maha atoa o te fenua nei, e i nia atoa i te mau manu o te reva, e te mau mea e nee haere i nia iho i te fenua, e i nia atoa i te mau i‘a atoa o te miti; tei to outou rima ana‘e ïa.

3 Te mau mea ora atoa e haere nei, ei maa ïa na outou, mai te mau raau maa atoa ra: ua horoa-atoa-hia ’tu e au na outou:

4 O te i‘o râ ma te ora atoa i roto ra, oia te toto, eiaha outou e amu i te reira.

5 Eita roa hoi au e ore i te titau i te hoo i to outou na toto i ora ’i outou; e titau hoi au i te reira i te mau mea ora atoa, e i te rima hoi o te taata nei; e titau hoi au i te hoo no to te taata nei ora, i te rima o to te taata ihora taeae.

6 O te haamanii i to te taata nei toto, na te taata atoa to ’na toto e haamanii: i hamani hoi te atua i te taata ma to ’na ihora huru.

7 O outou râ, ia rahi te tamarii, e ia rahi outou; ia rahi to outou huaai i nia i te fenua, e ia rahi roa outou i reira.

8 Ua parau maira hoi te atua ia noa, e ta ’na mau tamarii atoa ra, na ô maira,

9 O vau nei inaha, te fafau nei au i ta ’u nei faufaa ia outou, e to outou huaai a muri atu;

10 E te mau mea ora atoa i ǒ na ia outou na, i te mau manu pererau ra, e te mau puaa ra, e te mau manu avae maha atoa o te fenua; i te mau mea ora atoa o te fenua mai roto atoa mai i te pahi, e outou atoa na.

11 Te fafau nei au i ta ’u nei faufaa ia outou, e e ore roa e hope faahou te mau mea ora i te pohe i te pape diluvi; e ore hoi e diluvi-faahou-hia e pohe roa ’tu ai te fenua ra.

12 Ua parau maira hoi te atua, teie te tapao o te faufaa ta ’u e tuu nei ei tapao no ’u, e no outou, e te mau mea ora atoa i ǒ na ia outou na, no te mau ui atoa a muri noa ’tu:

13 O tau anuanua i roto i te ata ra ta ’u ïa e haapao nei, ei tapao no te faufaa na ’u i to te ao atoa na.

14 E ia faatupu vau i te ata i nia’‘e i te fenua nei, e ua itea te anuanua i roto i taua ata ra;

15 Ei reira vau e mana‘o ai i tau faufaa nei, o vau te tahi pae, e o outou te tahi, e te mau mea ora atoa e rave rahi te huru; e e ore roa te pape e riro faahou ei diluvi, e hope ai te mau mea ora i te pohe ra:

16 Ia anuanuahia hoi i roto i te ata ra, e hi‘o ïa vau, ia mana‘o vau i te faufaa mure ore na te atua i te mau mea ora atoa e rave rahi te huru i nia i te fenua nei.

17 Ua parau maira te atua ia noa, o te tapao faufaa ra teie i haamauhia e au no ’u, e te mau mea ora atoa o te fenua nei.

18 E taua na tamarii a noa mai roto mai i te pahi ra, o sema ïa, o hama ïa, e oiapheta: o te metua hoi hama no kanaana.

19 O na tamarii tootoru a noa ra teie; e ua î paatoa te fenua atoa ia ratou.

20 Riro atura noa ei taata faaapu, e ua ô ihora oia i te ô vine:

21 E ua inu hoi oia i te uaina, e taero ihora; e taoto tahaa noa ’tura oia i roto i to ’na fare.

22 Ite a‘era te metua o kanaana ra o hama, i tana metua i te vai-tahaa-noa-raa, e ua faaite a‘era i na tuaana no ’na i rapae ra.

23 Ua rave ihora sema raua o iapheta i te hoê ahu, tuu a‘era i nia iho ia raua, haere otua ’tura, i muri to raua mata, tapo‘i atura i to raua metua; aore raua i ite i te vai-tahaa-raa o to raua metua.

24 Ara a‘era noa i taua uaina na ’na ra; e ite a‘era oia i ta te tamaiti hopea i parau ia ’na ra.

25 Ua na ô a‘era, e ino roa kanaana, e riro oia ei tavini haehaa roa no to ’na ra mau tuaana.

26 E ua na ô a‘era hoi oia, e haamaitaihia iehova, te atua no sema ra, e e riro hoi kanaana ei tavini no ’na ra.

27 E faarahi roa te atua ia iapheta; e parahi hoi oia i roto i te mau tiahapa o sema, e e riro atoa kanaana ei tavini no ’na.

28 E a toru a‘era o noa hanere i te matahiti, e pae ahuru tiahapa, i muri a‘e i te diluvi ra.

29 E to noa pue matahiti atoa i te ao nei, e iva ïa hanere, e pae ahuru tiahapa; pohe ihora oia.

PENE X

1 O te huaai teie o te tamarii a noa ra; o sema, o hama, e o iapheta: ta ratou tamarii i fanau i muri a‘e i te diluvi ra.

2 O ta iapheta ra tamarii tamaroa, o gomera ïa, e o magoga, e o medai, e o iavana, e o tubala, e o meseka, e o tirasa.

3 E o ta gomera tamarii tamaroa, o asekeneza ïa, e o riphata, e o togarama.

4 E o ta iavana tamarii tamaroa, o elisa ïa, e o taresisa, e o kitima, e o rodanima.

5 No teie nei feia to te mau fenua i motu ê ra, to ratou reo ê, e to ratou fetii ê, to ratou fenua ê.

6 E o ta hama tamarii tamaroa, a kusa ïa, e o mizeraima, e o phuta, e o kanaana.

7 E o ta kusa tamarii tamaroa, o seba ïa, e o havila, e o sabata, e o raama, e o sabateka; e ta raama tamarii tamaroa, o seba ïa, e o dedana.

8 Fanau a‘era ta kusa o nimeroda; riro atura oia ei taata mana i te ao nei:

9 E taata rahi haharu hoi oia i mua i te aro o iehova: oia tei parauhia ra e, mai ia nimeroda haharu rahi i mua i te aro o iehova ra.

10 E te tupuraa o to ’na ra basileia, o babela ïa, e o ereka, e o akada, e o kalane, i te fenua ra o sinara.

11 Mai reira hahaere atura oia i asura, faatia ihora i te oire ra ia nineve, e te oire ra ia rehobota, e kala,

12 E resina i ropu i te area i te oire rahi ra o nineve, e o kala ra.

13 To mizeraima ra huaai, o te ati luda ïa, e te ati anami, e te ati lehabi, e te ati naphetuhi,

14 E te ati phaturesi, e te ati keseluhi, no ’na te ati philiseti, e te ati kaphatori.

15 Fanau a‘era ta kanaana o sidona, o ta ’na ïa matahiapo, e o heta,

16 E te ati iebusi, e te ati amori, e te ati geregasi,

17 E te ati hevi, e te ati araki, e te ati sini,

18 E te ati aravadi, e te ati zemari, e te ati hamati; e muri a‘era, purara ê atura te mau fetii ati kanaana ra.

19 E to te ati kanaana otia, mai sidona ïa, ia haere tia i gera ra, e gaza ra; a haere tia ’tu ai i sodoma, e gomora, e adama, e zeboima, e tae noa ’tu i laasa.

20 O ta hama eie pue tamarii, to ratou mau fetii, to ratou reo, to ratou fenua, e toratou nunaa.

21 E e tamarii atoa ta sema, ta te tuaana o iapheta, e metua hoi no te mau tamarii atoa a ebera ra.

22 Ta sema pue tamarii tamaroa ra, o elama ïa, e o asura, e o araphakesada, e o luda, e o arama.

23 E ta arama tamarii tamaroa, o uza ïa, e o hula, e o getera, e o meseka.

24 E fanau a‘era ta araphakesada, o sala; fanau a‘era ta sala, o ebera.

25 Fanau a‘era ta ebera pue tamarii tamaroa toopiti: o pelega te tahi i te i‘oa, no te mea tei to ’na ra anotau te ootiraahia te fenua nei: e o iokatana te i‘oa o to ’na tuaana.

26 Fanau a‘era ta iokatana o alemodada, e o selepha, e o hazaramaveta, e o iera,

27 E o hadorama, e o uzala, e o dikela,

28 E o obala, e o abimaela, e o seba,

29 E o ophira, e o havila, e o iobaba. na iokatana ana‘e ïa tamarii.

30 E te otia o to ratou parahiraa ra, mai mesa ’tu ïa e tae noa ’tura i te mou‘a ra o separa, i te pae i te hitia o te râ ra.

31 O ta sema eie pue tamarii, to ratou mau fetii, e to ratou reo, to ratou mau fenua, e to ratou nunaa.

32 O na fetii hoi eie o na tamarii a noa ra, i to ratou ra fanauraa, i to ratou ra mau fenua; e ia ratou ra te taaraa te mau nunaa o te ao nei i muri a‘e i te diluvi ra.